تَخاريف نُص مِيتر عَقلُه طَار (94) - ذكريات الـ facebook إيجيشان ستايل.

'المفروض القائمين على فيس بوك يعملوا اوپشين للمصريين ان ميطلعلهومش حوار شريط الذكريات بتاع كل يوم ده. بجد دي اسوأ حاجة على الإطلاق انك تصحى الصبح وتلاقي حاجات بتطلع لك من تلات واربع سنين فاتوا، انت قلت ايه وكنت بتفكر ازاي وصورك شكلك فيها كان عامل ازاي. ثورة ومجلس عسكري ومحمد محمود وماسبيرو وبورسعيد وانتخابات واتحادية وانقلاب ورابعة .. الأمل وبعدين الإحباط وبعدين الأمل وبعدين الإحباطات العديدة، وفوق ده كله الحبس والقتل والظلم والقهر. احساس الوطنية وبعدين الكُره والسعي ورا اي فرصة هجرة حتي لو في غانا، احساسك بانك فعلا من البلد دي وكُرهك ليها في كام سنة. احنا اتمرجحنا واتمرمطنا جامد اوي اوي. كل اللي بطلبه بس ان محدش يجي جنبي يشغلنا شريط الذكريات كل يوم الصبح! بجد احنا الجيل اللي الاربع سنين عدوا عليه بأربعين! علي رأي حمزة: 'الجيل اللّي شايب وهوّ شباب' :) الاغنية دي بتعلم عليّ جامد. ارحمنا يا مارك زوكربيرج مش حتبقى انت والايام عليا' ..

#كفاية_ذكريات #انا_مش_عايزة_افتكر #الهروب_علي_هيئة_نوم #النسيان_هو_الحل_علشان_نعيش #إسمعني #مُش_هبقي_نُسخة_من_ماضيك #تخاريف #النُص_ميتر_يتحدث 

تَخاريف نُص مِيتر عَقلُه طَار (93) - In the memory of the third of November.

Remember, remember!

The third of November,

The currency crash treason and plot;

I know of no reason,

Why the currency crash treason,

Should ever be forgot!

#VForVendettaFansWillRelate #تخاريف #DepressingTimes #IMFhasblackhistory101

تَخاريف نُص مِيتر عَقلُه طَار (92) - الـpassiveness إيجيشان ستايل.

'الطيارة فاتتني' .. 'العربية اتخبطت' .. 'القلم ضاع' .. دي مش لغتنا ولا طريقة كلامنا بس .. دي ثقافتنا كمصريين .. دة اسلوب حياتنا. خلينا نسمي الامور بمسمياتها و ان احنا شعب "باسيف " بطبعه. قلبه يتقطع ويموت لو اعترف بمشكلته. صعب وكرامته توجعه لو قال "أنا ضيعت القلم". لأن أكيد القلم ضاع و دي مشكلته. يتصرف هو بقي، احنا مالنا.  انما المصري بطبعه لا يُخطئ .. ضد المياة، ضد النار، ضد الاخطاء والمشاكل والحشرة الفار (بالاعتذار للفار اللي زارنا ونكد علينا من فترة). دائماً ما يكون الخطأ من كُل حاجة علي الكوكب الا هو .. الكوكب كُله بيتآمر علينا علشان منتقدمش ونبقي حاجة حتى لو كان "قلم." بس طبعاً مصر أم الدنيا وهتبقي قد الدنيا، وهتبقي كدة.