تَخاريف نُص مِيتر عَقلُه طَار (40) - البيوت أسرار.

البيوت أسرار و مقفولة علي ناسها .. كُل واحد فينا بيبقي شايف التاني مفيش عنده أي مشاكل و بيته مليان سعادة .. مع إن تقريباً لو كُل واحد فينا دخل قلب التاني، هيُشفق عليه .. شايف النُص اللّي عايز يشوفه و مشافش النُص التاني .. و لو شافه و خيرته إنه يبقي مكانه، و الله هيرفض .. لانه ببساطة مش هيعرف يتحمل الـ package كاملة .. محدش فينا مثلاً عمره فكر في الآية "وَلا تُعْجِبْكَ أَمْوالُهُمْ وَأَوْلادُهُمْ إِنَّما يُرِيدُ اللَّهُ أَنْ يُعَذِّبَهُمْ بِها فِي الدُّنْيا وَتَزْهَقَ أَنْفُسُهُمْ وَهُمْ كافِرُونَ' .. يعني المفروض مُش كُل حاجة تِبهرنا .. مُش كُل حاجة يبقي نفسنا فيها .. الله أعلم ربنا موزع نعمه إزاي و فين و لمين و ليه و إمتي .. بس محدش فينا بيُص علي قلبه .. و لا بيراجع نفسه .. لا عارف هوّ فين من كُل دة و لا هوّ فين و مين فيهُم عند ربنا. :)

وعلي الرغم من كدة، ما زالت الناس مبتسيبش بعض في حالها .. و ناس كثير بتشوف السعادة بس في حياة غيرها .. الرضا و القناعة و الحمد في ذاتهُم نعمة مش عند ناس كثير  .. كثير مننا محتاج وقفة مع نفسه لان ربنا عادل و بيدي كُل واحد فينا الحياة و الحاجات اللّي عارف انه محتاجها و اللّي هتسعده .. و هيبتليه بالصعوبات و المشاكل اللّي عارف انه هيتحملها و هيعدي منها و برحمته هيعرف يكمل .. و كله في وقته .. كل شيء عند ربنا سُبحانه و تعالي بقدر .. بس احنا مصممين نتفلسف و نعوز اللّي مش عندنا .. عارفين الصح و مش عارفنين نتبعه .. اه والله .. مصممين منثقش فيه و لا في حكمته ولا في عدله و اسبابه .. مع ان كُل حاجة مكتوبة من قبل ما نتخلق عنده .. و هوّ العليم الرؤوف بحالنا جميعاً .. أنا نفسي كثير بسأل ليه أنا و مش حد تاني .. و ليه دلوقتي .. و ليه مش فاهمة .. و ليه مش مقتنعة .. و ترجع الأيام و السنين تثبتلي ان في حاجات في حياة الواحد غالباً موجودة علشان منفهمهاش .. علشان نتعايش معاها و نرضي بيها و نثق في حكمته و بس .. و ممكن نموت و منعرفش الحكمة من وراها لانك لو عرفت، كنت هتدعي ربنا انك يا ريتك ما كُنت عرفت .. ربنا عدل .. عليم و حكيم و كريم بأحوال خلقه جميعاً .. عفوّ و رحيم و غفور و رؤوف و جبّار بعباده كلهم و بقلوبنا الضعيفة و الهشّة .. بيطبطب عليها في كُل لحظة بطريقته و بيبعتلك الحاجة اللّي عارف انك محتاجها في لحظتها .. ما منع أو أعطي عن أحد منّا إلا لحكمة يعلمها .. و ما زلت بسأل نفسي ليه بعد كل دة برضه روحي بتتفلسف و مش عاجبها و مش عارفة تجمد و تستحمل بعد العمر دة كله؟ و ليه مش عارفة تتغير و تغير مع انها في نفس الموّال من سنين؟

يا رب اهدنا و يسر الهُدي الينا و ارزقنا رؤية الحق و اتباعه .. و ارحم ضعفنا و ارزقنا الفهم و التفهُم و الرضا و القناعة و الحمد و الشُكر و اصرف عنّا شر ما قضيت يا الله ..