تَخاريف نُص مِيتر عَقلُه طَار (18) - العيّال كبرت. :)

عُمري ما هفهم ولا هتفهم الأهالي اللّي معندهاش مانع تهين أولادها أو اللّي بتضربهُم أو اللّي بتستخدم أسلوب التهديد و الوعيد أو اللّي بتسخدم أسلوب الـemotional abuse  مع أولادها .. دة مُش حُب و لا إهتمام .. القصص اللّي بسمعها وبشوفها عن الأهالي مع أولادها وحتي مع أهالينا في محيط دايرتنا مش أكثر حاجة مشجعة .. بحس إن الاهالي شايفة الموضوع إن إحنا مش حامدين ربنا علي النعمة و هما صح في كل حاجة و ليهم صلاحيات واسعة في الاهانة بدل الحب والتشجيع .. الاهالي المصرية عندها قدرة غريبة في انها تبث روح اليأس و الكره و الاحباط في أولادها منذ الصغر .. مع إن الواحد لوّ بصيلها، هيعرف برضه إن الأولاد نعمة .. المال و البنون زينة الحياة الدنيا .. لو الاهالي مش قد مسؤولية انهم يهتموا ويربوا ولادهم ويحبوهم من غير شروط، يبقي بيجيبوهم ليه؟ علشان يجيبوا ولاد تانين في زمن بائس أكثر ويطلعوا في ولادهم كل العُقد اللّي ربتوها فيهم زمان؟! 

لوّ بتهين إبنك و تقول عليه غبي علشان مبيذاكرش و لا حاب درجة مش ولا بد، دة مُش إهتمام .. لوّ بتقول ضربته علشان عرفت انه بيعمل تصرف غلط، يبقي مش اهتمام .. لوّ بتستخدم اسلوب انه لوّ معملش حاجة معينة يبقي هوّ مُش كويس و لا ربنا غضبان عليه علشان مسمعش كلامك مُش إهتمام، بل إنت بتلغي شخصيته .. لو بتقوله إنك مش بتحبه علشان عمل تصرف ضايقك، يبقي مُش إهتمام .. لوّ كل ما يعمل حاجة عكس كلامك تقوله ربنا قال وقل لهما قولاً معروفاً، يبقي مش اهتمام لانه ما بيعمل اللي يريحه مش معناها انه مش هيقول قولاً معروفاً .. لوّ كل موقف وحش هتقوله علشان انا مضايق منك، مش اهتام ..  لوّ قال كلام و لا رأي مختلف وروحت ضاربه و لا هينته قصاد الناس مش إهتمام .. و لو فاكرين ان هو دة اسلوب الحب، يبقي نفسي تعرفوا ان محصلش .. عمر ما كان الاهتمام كدة .. الاهتمام والحب أرقي واحلي من كدة بكثير .. لوّ هو دة الاهتمام يبقي بلاش منه .. طلعوا و ربوا ناس سوّية .. قربوا منهم .. عيشوا حياتهم .. اعرفوا مشاكلهم ايه و ساعدوهم يحلوها .. اعرفوا صحابهم .. اهتمامتهم ..  الحاجات اللي بتفرحهم و اللي بتزعلهم .. كونوا موجودين ليهم من غير شروط بدل ما انتم كمان تبقوا مشكلة تانية قي حياتهم .. خليكم محل ثقة مش خوف .. متحوطوش راسكُم براس أولادكم اللّي لا عندهم خبرة في الحياة و لا يعرفوا عنها حاجة اصلاً .. ساعدوهم يكبروا ويحبوا اللّي حواليهم .. تعبنا من مجتمع غير سوي عمّال يطلع ناس غير سويّة تانية .. الدايرة عمّالة تكبر .. المجتمع مليّان ناس مشوهة من جوّة كثير .. نفوس غير سوية .. و مش قادرة الومهم .. كل واحد مسؤول عن تصرفاته، بس ليه تبقي الاهالي جزء من المشكلة بدل ما تكون جزء من حلها. بطلوا تصدروا احكام مسبقة علي أولادكم .. هيكبروا وعمرهم ما هيسامحوكم .. و الله ساعات بحس ان عُمر اللّي إتكسر زمان ما هيتصلح .. ولادكم مش هينسوا .. تعبنا من تربية مش صح و يقولوا هو دة الدين .. و أي دين اللي بيقول كدة؟ الدين اللي بيدعوا للرحمة والعفو والتسامح والألفة؟ القصص اللي بقراها الفترة اللي فاتت مرعبة ومخيفة .. الاولاد بتفتكر .. خليهم يفتكروكم بذكري كويسة الله يكرمكم. و لا حول و لا قوة الا بالله. :) 

يا ريت تفكروا من فضلُكم قبل ما تجيبوا عيّال للدُنيا و انتم مش مستعديين لا نفسياً و لا مادياً و تروحوا متطلعين فيهم عُقدكم في عالم و كوكب أصلاً بائس. دي مش خطوة بنمشي فيها علشان كل الناس بتعملها .. الموضوع دة بالذات مش متعلق بيكم .. انتم مش رايحين تشتروا حاجة تفرحوا بيها شوية و هينفع تتخلصوا منها ..هوّ مُش لعبة .. الموضوع متعلق بيه .. انك تفرحه و تسعده .. دي روح عايشة محتاجة اللّي يعتني بيها .. انك تجيب كائن علي الكوكب دة مسؤولية و عطاء و طاقة و مشاعر كثير .. و لو مش قدها، ييقي يا ريت خُد وقتك لغاية أما تقدر تشيلها. :)